Tamizhaga Arasial Katchigal தமிழக அரசியல் கட்சிகள்

உலகில் தமிழ் நாட்டில் மட்டுமே தமிழ், மாநில மொழியாக பேசப்படுகிறது. அதிலும் மிகச் சிறப்பு வாய்ந்த ‘தூய மெட்ராஸ் தமிள்’ நம் சென்னைவாசிகளுக்கே சொந்தம். அந்தச் சிறப்பு வாய்ந்த இனிய தமிலில் இப்புத்தகத்தை ஆரம்பித்த விதம் ‘சோ’க்காக இருக்கிறது. சோ அவர்களின் நையாண்டியும், நகைச்சுவையும் நிரம்பிய இப்புத்தகம் படிப்போரின் சிந்தனையையும் தூண்டும் விதமாக உள்ளது.

இ.காங்கிரஸையும், இந்து மதத்தையும் ஒப்பிட்ட இடம் வெகு ஜோர். நாட்டுக்கு சுதந்திரம் வாங்கித்தந்த கட்சி, இந்தியாவிலே மிகவும் பழமை வாய்ந்த கட்சி, செல்வாக்கு மிகுந்த கட்சியான காங்கிரஸ் இன்று வெறும் பெருங்காய டப்பாவாக ஆனது ஏன், எப்படி, எவரால் என சோ அவர்கள் அலசி, நுணுக்கமாக ஆராய்ந்த விதம் அபாரம்.

நம் தமிழ்நாட்டில், இரு மாநில கட்சிகளைத் தவிர வேறு தனி நபர் கட்சியோ, கூட்டணி கட்சியோ, தேசிய கட்சியோ ஆட்சிக்கு வருவதற்கில்லை என்ற சாபக்கேடு. மத்தளத்திற்கு இரண்டு பக்கமும் இடி என்பது போல இவ்விரு கட்சிகளுக்கிடையே அகப்பட்டு நசுங்கி, முழி பிதுக்கும் நம்மைக் கண்டு நமக்கே பரிதாபம். இதில், தான் தேர்தலில் ஓட்டளித்த வெற்றி பெறச் செய்த கட்சிக்கு, அவர்களின் அராஜகங்களுக்கு சால்ஜாப் அளித்து சுய கௌரவத்தை காப்பாற்ற முயலும் ஏமாளி ஒட்டாளர்கள்; அவர்களை விட இவர்கள் தேவலை என (வீண்) ஆறுதல் அடையும் அல்ப சந்தோஷிகள்; ராமன் ஆண்டால் என்ன ராவணன் ஆண்டால் என்ன, என்று நினைக்கும் விட்டேத்திகள். ஆக மொத்தம் கூட்டிக் கழித்துப் பார்த்தால், நம் மக்களுக்கு மீறுவது ஏமாற்றமும், விரக்தியும்தான்.